By DELIA CUARESMA
Hindi pa man nagtatagal sa kanya ang korona bilang Miss Universe PH 2026, agad nang hinarap ni Bea Millan-Windorski ang matinding batikos mula sa mga bashers na kinukuwestiyon sa kanyang pagiging Filipina.
Half-Filipino si Bea mula sa kanyang ina, habang American citizen naman ang kanyang ama.
Para sa ilan, isyu ito.
Anila, wala siyang karapatan maging Miss Universe Philippines 2026, sabay ungkat sa kanyang nakaraan, partikular ang pagre-represent niya sa United States sa Miss Earth 2024.
Pero para sa iba, hindi ito kabawasan sa kanyang pagiging Pilipino, lalo’t malinaw na pareho niyang niyayakap ang dalawang panig ng kanyang pinagmulan.
Binanggit nga ng mga supporters ni Bea na simula pa 2019, regular na siyang bumibisita sa bansa para magsagawa ng charity work.
Dagdag pa nila, ang kanyang adbokasiya na Project Curma, na tumutulong sa pangangalaga ng pawikan, ay sinimulan pa niya bago pa man siya sumali at manalo bilang Miss Earth Air noong 2024, patunay na hindi ito basta pakitang-tao lamang.
Sa gitna ng intriga, agad na dumipensa si Joy Barcoma, isang environmental advocate at dating kinatawan ng Pilipinas sa international pageantry.
“(Bea Millan-Windorski) IS NOT AN OPPORTUNIST! She literally asked me where she can join protests. SHE RALLIED WITH & FOR FILIPINOS,” ani Joy sa kanyang post sa X.
Hindi rin siya nag-atubiling sagutin ang mga kumukuwestiyon sa identidad ni Bea.
“Don’t ever question her pagka-’Pilipino’ dahil mas Pilipino pa siya kaysa sa mga pinanganak at tumira sa Pinas pero hindi man lang kayang bumoses at ipaglaban ang bansa,” dagdag pa niya.
Pero para kay Bea, ang mga batikos na ito ay hindi na bago.
Sa isang panayam, inamin niyang matagal na siyang nakararanas ng pambu-bully—lalo na pagdating sa kanyang pisikal na anyo.
Isa sa madalas punahin ng bashers ay ang kanyang baba, isang bagay na matagal na niyang natutunang tanggapin at ipagmalaki.
“My chin is something I love cause it’s the same chin as my mom, as my lola, and I would rather honor the stories of the women who came before me than fit a certain beauty standard,” ani Bea.
Sa kabila ng ingay online, marami rin ang naninindigan na ang pagiging Pilipino ay hindi nasusukat sa lugar ng kapanganakan, kundi sa koneksyon, puso, at malasakit sa bansa.
Ngayon, bilang kinatawan ng Pilipinas sa Miss Universe 2026 ngayong Nobyembre, dala ni Bea hindi lamang ang kanyang korona kundi pati ang mas malalim na usapin ng identidad at representasyon.
Yun na!
