Naglabas kahapon ng subpoena ang Department of Justice (DoJ) laban sa suspects sa kidnap-slay ng Korean businessman na si Jee Ick Joo para sa muling imbestigasyon ng krimen.
Ipinalabas ni Senior Assistant State Prosecutor Juan Pedro Navera ang subpoena matapos na iutos ng Angeles City Regional Trial Court (RTC) Branch 58 ang reinvestigation ng kasong kidnapping for ransom with homicide.
Kasama sa subpoena ang mga respondent na sina Supt. Rafael Dumlao, Jerry Omlang, Gerard Santiago, PO2 Christopher Baldovino, SPO4 Roy Villegas, SPO4 Ramon Yalung, at SPO3 Ricky Sta. Isabel.
Isinama rin sa subpoena si Christopher Alan Gruenberg at househelper ni Jee na si Marisa Dawis Morquicho.
Maliban sa naturang respondents, ipinatatawag din ng DoJ ang asawa ni Jee na si Kyujin Choi at si Senior Supt. Glenn Dumlao, hepe ng Philippine National Police-Anti-Kidnapping Group (PNP-AKG).
Inutusan ang mga pinadalhan ng subpoenas na lumitaw sa DoJ office sa Manila para sa itinakdang hearing sa February 3. (Jeffrey G. Damicog)
