By DELIA CUARESMA
Naku, ito na pinaka-latest na patunay na sa Pilipinas, isang simpleng biro lang, puwede maging ugat ng kaguluhan.
Nagsimula ito sa simpleng video mula sa isang event performance, kung saan maririnig ang Popstar Royalty na si Sarah Geronimo na pabirong nagsabi: “Iboto niyo po ako sa susunod na eleksyon.”
Isang linya, isang tawa lang dapat. Pero iba ang internet. Masyadong seryoso ang take sa mga bagay-bagay.
May mga napa-“Wait lang, tatakbo ba siya sa 2028?” habang ang iba nama’y nag-theorize na baka endorsement na ito sa kapangalan niyang si Sara Duterte.
O diba? Isang joke, naging brainstorming session. Parang group work na walang leader. Kaloka!
Dahil sa lumalaking kalituhan, naglabas ng paglilinaw ang G Productions, ang kumpanyang pag-aari nina Sarah at Matteo Guidicelli. Ayon sa kanila, ang linya ay bahagi lang ng playful na pakikipag-interact sa audience ni Sarah at walang kinalaman sa anumang planong tumakbo sa eleksyon.
Sa madaling salita: Hindi ito early filing of candidacy, punchline lang.
Dagdag pa ng kampo ni Sarah, masaya ang singer-actress kung nasaan siya ngayon, that is, on a concert stage, hindi sa entablado ng politika. Well, kung tutuusin, mas safe nga naman doon: mas predictable ang high notes kaysa sa election results.
Pero aminin natin, ibang level talaga ang talento ng mga Pilipino pagdating sa overthinking. Kayang gawing national issue ang isang offhand joke. Isang charot, may analysis agad.
