BY REGGEE BONOAN
*
PURING-puri ni Robin Padilla ang asawang si Mariel Rodriguez- Padilla dahil lahat ng gusto nitong pagkain ay inaaral gawin ng huli.
Ang latest na natutunan ni Mariel ay ang pag-bake ng paboritong Spanish bread ng aktor.
Kinunan ni Robin ang asawa habang nagmamasa ng harina hanggang sa maluto na ito.
Ang caption ng aktor sa nalutong tinapay ni Mariel, “Walang hindi nakukuha sa tiyaga! Buong araw pinag isipan at maghapon na ginawa at inulit-ulit upang maihandog ang aking paboritong tinapay no’ng akoy 8 taon gulang sa Banawe Street sa Quezon City.
Kwento pa ni Binoe, “Araw-araw tuwing hapon walang mintis pagkagaling sa Siena College sa may Del Monte Avenue magmamadali akong umuwi at hihirit kay ermats ng merienda pagbibigyan naman ako at pabibilhin ako ng Spanish bread sa bakery sa tapat ng bahay namin.
“Kaligayahan ko no’ng bata ako itong tinapay na ito katunayan ngayong matanda na ako ay hinahanap ko pa rin ito kapag naliligaw ako sa mga local bakery kaya’t pinag aralan ni @marieltpadilla gawin ito dahil alam niya hindi lamang sarap ang dulot ng spanish bread sa akin kundi matatamis at maliligayang alaala ng aking kabataan.
“Maraming salamat babe sa napaka-personal na handog na ito.”
Personal naming kilala si Mariel at lahat ng makakapagpasaya kay Robin ay ginagawa niya bilang maybahay.
