By Delia Cuaresma
Kalalabas lang ng ospital ni Sharon Cuneta makaraang dumaan ito sa operasyon.
Ibinahagi ito ng Megastar sa kanyang mga fans Martes sa pamamagitan ng Instagram, kung saan nag-post siya ng litrato ng kanyang kanang kamay. May takip na bulak ang isang parte nito.
Ani Sharon, “This is just a photo of my right hand after my I.V. had been removed. I just got home after my second lipoma surgery.”
Ang lipoma ay isang non-malignant tumor na gawa sa taba. Madalas itong matagpuan sa batok, likuran, balikat at tiyan.
Matatandaang sumailalim sa parehong operasyon ang beteranang aktres-singer nitong Abril lamang.
Kuwento ni Sharon mas malaki ang bukol na tinanggal sa kanya ngayon.
“I still have a drain attached which they will remove tomorrow. Please say a prayer for me,” dagdag niya.
