By DELIA CUARESMA
Sinurpresa ng actress, singer, at digital creator na si Donnalyn Bartolome ang mga fans matapos niyang ibahagi ang isang mahalagang desisyon tungkol sa kanyang online career sa isang post.
Sa kanyang pinakabagong YouTube upload na pinamagatang “The Gift Reverse,” hayagan niyang inamin na pinag-iisipan na niyang tuluyang magpaalam sa mundo ng vlogging—isang industriyang matagal na niyang naging tahanan.
Sa halip na karaniwang masaya at makulay na content, mas naging tahimik at introspective ang tono ng naturang vlog.
Ibinahagi ni Donnalyn na dumating siya sa punto ng kanyang buhay kung saan mas pinahahalagahan na niya ang sariling kapakanan at personal na kaligayahan.
Ayon sa kanya, matagal na siyang nakatuon sa pagbibigay-saya sa ibang tao, ngunit ngayon ay nais na rin niyang tanungin ang sarili kung ano ba talaga ang makapagpapasaya sa kanya bilang isang indibidwal.
Hindi naging madali para sa content creator ang desisyong ito, lalo na’t milyon-milyon ang sumusubaybay sa kanyang channel.
Inamin niyang may mga bahagi ng kanyang pagkatao at buhay na hindi niya lubos na naibabahagi sa publiko, dahilan upang maramdaman niyang hindi niya lubusang naipapakita ang kanyang tunay na sarili.
Gayunpaman, hindi niya kinalimutan ang pasasalamat. Buong puso niyang kinilala ang suporta ng kanyang viewers na naging daan upang matulungan niya ang kanyang pamilya at ang mga taong malapit sa kanya, pati na rin ang pagbubukas ng mga oportunidad para sa iba.
Bilang pamamaalam, inanunsyo ni Donnalyn na gagawa pa siya ng huling sampung vlog.
Sa mga ito, bibigyan niya ng kapangyarihan ang kanyang followers na pumili ng nais nilang content at makakasama sa channel—isang huling pakikipag-ugnayan bago siya tuluyang magsara ng isang mahalagang yugto ng kanyang digital journey.
