BY ROWENA AGILADA
Nakaranas ng tinatawag na exorcism si Alden Richards sa mismong bahay na ipinagawa niya.
Kuwento niya sa “Eat Bulaga,” isang lumang bahay ang nabili niya at ipina-renovate niya ‘yun.
Ang sabi raw sa kanya ng contractor, four months lang gagawin ang bahay at tapos na. Pero almost a year na’y hindi pa tapos.
Ang sabi raw sa kanya ng construction workers, may kakaiba silang nararamdaman kapag nagtatrabaho sila. Parang may kung ano’ng pumipigil sa kanila.
May nakilalang pari si Alden at sinabi niya ang kababalaghang nangyayari. Sabi raw nito sa kanya ay may masamang elemento sa ipinapagawa niyang bahay.
Ipina-exorcise niya ‘yun. May binasa ang pari tungkol sa exorcism. Ani Alden, nag-iba ang pakiramdam niya pagdating sa kanyang kuwarto na ayon sa paring nakilala niya, ‘andun ang malakas na masamang elemento.
Matapos mabasbasan ang buong kabahayan ay umaliwalas ang pakiramdam ni Alden. Somewhere sa Sta. Rosa, Laguna ang bahay na tinitirahan niya ngayon kasama ang kanyang pamilya. Wala na silang kakaibang nararamdaman.
SUWERTE
Last year pa kinukumbinse ni Gabbi Garcia ang boyfriend niyang si Khalil Ramos na lumipat sa GMA7. Nagtagumpay siya at suwerte naman si Khalil sa paglipat niya at pagpirma ng kontrata.
Sunud-sunod ang exposure niya sa Kapuso shows at magkakaroon pa sila ni Gabbi ng mini-series.
Ayon sa netizens, tila ang lakas naman daw ni Gabbi sa management at wish granted agad na magtambal sila sa isang proyekto.
Request naman ng netizens na bigyan din sina Janine Gutierrez at Rayver Cruz ng project together. Nauna pa raw lumipat si Rayver sa GMA7 dahil kay Janine.
