BY JUN NARDO
*
PATULOY ang pag-arangkada ng mga namemeke sa social media, huh!
Todo-arya pa rin sila sa paggamit ng mukha at pangalan ng mga kilalang artista sa pagbuo ng mga pekeng social media accounts!
Ang latest victim? Si Alden Richards!
Yes, may pekeng Alden Richards sa Instagram.
Ito nga at agad nagbabala ang Asia’s Multimedia Star sa kanyang Instagram stories at pinaalam sa kanyang followers na fake ang account na ‘yun.
Anyway, habang wala pang tapings, ang pagkakaroon ng live game streaming ang pinagkakaabalahan ni Alden para makapag-interact sa kanyang mga fans.
Ang isa pang celeb na pineke sa social media ay si Allan K.
Yes, may pekeng Allan K sa Facebook naman.
Sinabihan na ni Allan ang followers na tanging sa Instagram lamang siya may account.
NAGPAKITA NA!
Umapir na si Super Tekla sa “Tutok to Win sa Wowowin” ni Willie Revillame.
Personal na humingi siya ng apology sa TV host at niliwanag ang pagkakawala niya sa “Wowowin” as co-host noon.
Naging daan sa paghaharap ng dalawa ang mismong nagrekomenda sa kanya sa “Wowowin” na si Donita Nose.
Tinanggap naman ni Willie ang sorry ng komedyante at nangakong magbibigay ng tulong sa anak nito.
